Léak Lemahan

Buina yén mancing di tongos ané tenget bisa masi candéna tekén ané nongosin ditu. Bisa masi bé ané suba bakat pancing ilang padidian.

Luir, malajah mamancing uli kelas 4 SD. Kanti kayang jani suba ngelah panak kurenan buduhné mamancing tusing masi dadi kuangina. Yén unduk nepukin wong di kapetengan nuju ia mancing tondén taén. Nanging, ada masi kenehné jerih sabilang ada timpalné ngajakin mancing peténg. Ia tusing san demen mamancing ka tukadé, demenné tuah mancing di pasihé menékin jukung. Magenepan suba gelahanga prabot pancingé, yén saihang miriban ajin prabotné ento nyidaang suba ia ngaé umah matingkat.

Luir ngelah timpal ané masi buduh mamancing uli pasisi Batubelah madan I Gedur. Ia mula akit-akitanné nuju mamancing buina masi I Gedur ngelah jukung. Aluh bana lakar luas mamancing ajaka dadua, asal ada galah melah, ombaké melah jeg sing ada nyidang ngalangin makadadua luas mamancing.

Dugas Rediténé ané ipuan, Luir nélpon sawitranné I Gedur. Gedé bayunné lakar luas mamancing peteng nemunin ngemaniang purnamané ané lakar teka. Galang pasihé sinah liu bé ané gedé-gedé lakar ngamahin kéto abetné.

“Dur mancing lah?” 

“Bin dan Dék?” kéto sautné I Gedur di HP-né.

“Ngamaniang purnamané buin petang dina, jeg melah san asanné daatan pasihé neked ditu.” 

Makelo gigis I Gedur masaut, miriban ia makeneh sambilanga malinin kalénder. Ada sorot telung menit mara ada sautné.

“Alihang ja galah lénan Dék! Buin limang dina ngamaniang Kajeng Kliwon, yén di film-film orahanga malam Jumat Kliwon. Takut nyanan nepuk léak neked ditu!” keto sautné.

“Béh nu duén I Pekak Gedur takut jak ané kéto-kéto. Mai té atehin kesep, amun cai jerih déh suba padidi lakar luas, bang dogén nyilih jukungé. Bang suba tiang apang amaha ajak léaké!” sautné sambilanga kedék ngakak.

“Cutetné tiang sing milu, aba suba jukungé. Ingetang duén bekelin bawang ibané. Yén ada léak apang ngahngah matanné, buung léaké ngamah cai”. 

I Gedur masi kedék ingkel-ingkel sambil macekohan.

“Nah kancutang suba butuh cainé, kanti jani tondén ja tiang taén nepukin goban léak” kéto sautné Dék Luir masi kedék sambilanga ngamatiang HP.

Neked dinané ento, uli jam 3 ia suba mersihin prabotné. Pamales ané mael pesuanga dadua, spinning abesik, trolling abesik, makadadua anggonina tali PE. Pesu masi timah ané bisa ngendih a kotak lan prabot ané lénan luiré a kresék liunné. “Nyanan nyak selamet maan bé gedé, kar igelin bongné I Gedur” kéto abetné sambilanga ngakit pancing dingehanga tekén somahné.

“Pak jak nyén bapak kar mancing?” kéto patakon somahne Dék Luir.

“Bapak lakar mancing padidian. Bebedagé I Gedur tusing nyak milu. Takut koné amah léak nak mani Kajeng Kliwon!”

“Melahang té Pak, nyanan saja ada léak di pasihé, lantas amaha Bapak, man tiang nyén ngrunguang?” kéto kurenanné ngomong sambilanga nyandén Dék Luir. Sautina aji kejengitan dogén sambilanga ngetokin sirah somahné aji muncuk pamalesné.

Sanjané ento makiré engseb sang surya, Dék Luir suba teked di pasisi Batubelah. Jukungné I Gedur suba mategul di pasih tinggal menékin duén. Lengis di mesinné suba misi, sundih suba masi ada, barén suba masi sedianga tekén I Gedur. Lega pesan kenehné Dék Luir ngelah timpal satia buka I Gedur. Makejang prabotné suba menék ka jukungé, tinggal menékin duén. Dék Luir lantas ngenyit dupa, mesuang canang sari uli kreséké anggona maturan di sanggah pesisin Batubelahé jak di petaksuan jukungé. Apa kadén mantrané anggona Dék Luir mamantra bibihné komat kamit cara kinyukan jit siap. Uli joh I Gedur malaib maekin jukungé.

“Jani cai kar majalan, Dék?

“Men kénkén kar milu cai? Sautné sambilanga nyengir laut ngentungin timpalné aji bunga.

“Tusing, padalem ngalahin kurenané jumah, tumbén nagih majangkut” sautné sambilanga kedék ingkel-ingkel.

“Sing ngranaang kakul puyung cai, pedemang suba ibané jumah.”

“Ingetang duén ngaba HP-né, mun cai nepukin léak, ingetang rekam mani pang aluh cang upload ka facebook. Idiolas da nyen ceburanga ka pasih ibané, padalem somah cainé jumah sedeng layu bungane,” I Gedur ngénggalang mlaibin timpalné satondéné galak.

“Bangka suba cai,” sautné Dék Luir ngejengit sambil menék ka jukungé.

Plaibanga jukungné ngatengahang beneng kauh ngalih pasisi Tulamben. Sing san ada rasa takut nang abedik di kenehné ulian ngaat lakar maan bé gedé. Disubané neked lantas ia ngendihang lampu, lakar jigging bongné malu, kéto abetné.

Ada suba telung jam ia mamancing ditu, kéwala tondén ada bé ané nyak ngamahin, galahé miriban ada suba jam 11. Jigging suba leleh, lantas ia mancing dasaran. Godoga barén awanné asibak laut pasanga di pancingné. “Né suba kagedénang maang iba barén, né suba amah jani!” kéto abetné sambilanga mecuhin pancingé ping telu.

Ada miribang buin limang menitné mamunyi ngering spinning-né, sinah suba bé gedé ané ngamahin. Ngénggalang Dék Luir nyemak pamalesné nglawan bé ané ngamahin pancingné. Kayang jukungé milu majalan kedenga tekén béné. “Pantet suba ditu, gedénang bayuné! Kéto raosné Dek Luir sambilanga nglawan béné, nanging kanti pesu peluh ngerebég buina tali ané di kérékné suba lakar telah, tondén masi rasa kar telah bayun béné ané ngedengin. Malinder paida jukungé ngajanang. Rasa képek limanné nglawan béné ento, lawananga ngérékin talinné. Kéwala disubané maan ngérék sorot molas méter, buin nglawan béné ngedengin talinné. Tumbén jani Dék Luir nepuk unduk buka kéto. Selamet bakat béné né, kar igelang di umahné I Gedur, kéto kenehné sambilanga ngulurin pancingné.

Ada suba a jam tengah nglawan béné ento, tondén masi marérén mlaibang jukungné kangin kauh. Ané jani tusing ada rasa liang buin di kenehné lakar maan bé gedé. Sing kodag-kodag takut ané rasaanga, jejeh lakar kedenga neked ka Lombok tekén béné ento. Yén lébangina pemalesné sinah prabotné lakar ilang, praboté ento masaih tekén ajin godél aukud. 

“Ratu bhetara, kapok ampun tiang, kapok. Usanang nyengkalén tiang,” kéto raosné Dék Luir sambilanga tetep ngisang pamalesné.

Disubané tusing nyidaang buin lakar nglawan, lantas jemaka guntingné di kantong celanané. Laut getepé tali ané di kerék pancingné. Disubané jukungé merérén, tegakanga awakné di bucun jukungé sambilanga negtegang bayunné ané runtag. Ada sorot samas méter ilang tali PE ané di kerékné. Sambilanga nyemak yéh bekelné, buin rasaanga makedengan jukungné majalan nganginang. Ngénggalang geluta panepi jukungné apanga tusing mapolét awakné.

“Jani suba lakar nepuk léak awaké!” sambilanga nekekang magisian. Tingalina pasisi Batubelahé suba sayan paek. Lantas jemaka tali nilon di tasné, laut tegulanga di muncuk pagisian katir jukungné. Lantas kecosanga ibanné ka pasihé laut ngelangi ka sisi sambilanga tetep ngisi taliné ento. Nu masi ada keneh nylametang jukung timpalné. Disubané teked di pasisi, laut tegulanga taliné di punyan waruné. Lantas Dék Luir ngénggalang ngalih motorné, mara seluka kantongné ngalih kunci makesioran kenehné, kunciné kecag di tas pancingné. 

“Béh yén oyongang dini, sinah suba léak ané ngedeng tunian lakar teka. Adian suba i déwék majalan ka umahné I Gedur,” raosné sambilanga malaib lakar ngalih umahné I Gedur.

Umahné I Gedur sawatara ada 2 kilo johné uli pasisi Batubelah. Rasa pakpak cicing batisné Dék Luir malaib sing masandal ulian sandalné kecag di jukungé. Disubané teked di pakaranganné I Gedur laut ia makaukan.

“Dur, Mang Gedur, tulungin awaké jani. Amah léak icang Mang. Bangun énggalin cai suud majangkut. Jalan ka pasisi jani jagjagin jukungé pang sing ilang!”

Maampakan jelanan umahné I Gedur pesu macawet dogén.

“Kenapa cai Dék? Né suba jam setengah lima semengan, tusing ada léak lemahan dini,” sambilanga ngusapin pelék ajak tétéh di muanné.

“Bebedag cai, né tiang macebur uli di jukungé ané sing marérén-rérén kedenga jak léaké, lan jani alih jukungé,” sambilanga nelik matanné.

“Men ngujang cai malaib mai, motoré dija?”

“Kunciné kecag di jukungé,” saut Dék Luir sambil ngésgés sirahné.

Ngénggalang I Gedur mulihan nyemak celana, lantas ngidupang motorné majalan ka pasisi. Neked ditu dapetanga jukungné suba sayan ka sisi, lantas macebur makadadua ngelangi ngatengahang ngalih jukungé. Disubané tekéd lantas buin rasananga malaib jukungné.

“Néh, né orahang sing ada léak lemahan. Ne buktinné jani,” Dék Luir mamunyi sambilanga magisian das mapolét.

“Ngujang sing idupang mesiné anggon nglawan, lengeh cai,” sautné sambilanga majalan ka bucun jukungé lakar ngidupang mesin.

Disubané mesinné idup, makelo-kelo suud makedengan jukungné. Lantas abana jukungné ka sisi. Lantas penékanga kipas mesinné apang tusing ngentug di batuné. Ditu tepuka tali PE pancingné Dék Luir makilit.

“Né jani sambung ka kéréké, kedeng adéng-adéng apang sing buin nglawan léaké. Tong cara nak tumbén mamancing, né talin cainé misi bé ulesné boya ja léak ané ngedeng,” sambila ngenjuhang taliné kenyem-kenyem bibihné.

Dék Luir nu masi jejeh kenehné, adéng-adéngina ngerék pancingné. Disubané sayan paek, tepuka bé kakia gedé kambang makedengan.

“Nah to suba léaké ané kencanang cai uli ibi jani suba mati,” I Gedur nujuhang sambila nampedang prabot timpalné.

Dék Luir negak di biasé sambilanga nlektekang kakiané ento. Pejanga pancingné di samping béné ento, lantas ngebah ia di biasé, jengah sajan kenehné dinané jani. Lek tekén timpalné, elek masi tekén awakné padidi. Buin kejepné jeg nglépat kakiané ngonong ngatengang, sépanan Dék Luir kamemegan nyemak pancingné kedenga kén béné. Kakiané ilang mlaibang prabotné ane ajinné masaih tekén godél aukud ento.

“Ento suba madan léak lemahan mlaibang pancing Dék. Kadén ci suba mati léaké?” kéto abetné I Gedur sambila kedék. Luir bengong mangenang prabotné plaibanga ajak kakiané. 7